Sreedevi S. Kartha

ശ്രീദേവി എസ്. കര്‍ത്താ

1966 ല്‍ തിരുവനന്തപുരം ജില്ലയില്‍ ജനനം. ഇംഗ്ലീഷ് സാഹിത്യത്തില്‍ ബിരുദാനന്തര ബിരുദം, ജര്‍മ്മന്‍ ഭാഷയില്‍ ബിരുദാനന്തര ഡിപ്ലോമ. വിവിധ ദൃശ്യമാധ്യമങ്ങളില്‍ പ്രവര്‍ത്തിച്ചു. കവിയും വിവര്‍ത്തകയും പത്രപ്രവര്‍ത്തകയുമാണ്. പ്രമേയത്തിന്‍റെ തിരഞ്ഞെടുപ്പിലും രചനാശൈലിയിലും തികച്ചും വ്യത്യസ്തമാണ് ശ്രീദേവിയുടെ കവിതകള്‍. മലയാളകവിതക്ക് ചിരപരിചിതമായ വിഷയങ്ങള്‍ പോലും അവതരണരീതി കൊണ്ട് കാലികമാകുന്നു. ‘സെന്‍റിമെന്‍റല്‍ എച്ച്2ഒ’ എന്ന കവിത തന്നെ നല്ല ഒരു ഉദാഹരണം. ഗൃഹാതുരത എന്നോ നഷ്ടഹൃഹോത്കണ്ഠ എന്നോ ഒക്കെ വിശേഷിപ്പിക്കാവുന്നതാണ് ഈ കവിതയുടെ പ്രമേയം. “ഇന്ന് ഞാന്‍ അപ്പച്ചിയുടെ വീട്ടില്‍ പോകും. നാല് മണിക്ക്” എന്ന് ആരംഭിക്കുന്ന കവിതയില്‍ നിന്ന് അതിന്‍റെ പേരില്‍ നിന്നെന്ന പോലെ അവര്‍ വൈകാരികതയെ ഊറ്റി വേര്‍പ്പെടുത്തിയിരിക്കുന്നു. സമയം, യുക്തി, ജീവിതാവസ്ഥകള്‍ എന്നിങ്ങനെ എല്ലാം കെട്ടുപിണഞ്ഞ ഒരു രചനാശൈലിയാണ് ശ്രീദേവി എസ്. കര്‍ത്തയുടേത്. കവിത ഏതു വിഴിക്കും സഞ്ചരിച്ചേക്കാം എന്ന ഭ്രമാത്കതയില്‍ വായനക്കാരെ എത്തിക്കാന്‍ എഴുത്തുകാരിക്ക് കഴിയുന്നുണ്ട്. “കണ്ടെന്നുമവള്‍ കണ്ടതേയില്ലെന്നും” എന്നകൃതിയിലെ ‘സാരി’ എന്ന കവിതയാണ് ഇവിടെ ഉള്‍പ്പെടുത്തിയിട്ടുള്ളത്. സാരിയായും ഹൃദയമായും രൂപാന്തരപ്പെടുന്ന ഒന്നിനെ കുറിച്ചാണ് കവിത. ഓരോ ദിവസവും ശുദ്ധമാക്കപ്പെടുന്നത്, ഓരോ ദിവസവും അശുദ്ധമാകുന്നതും അടിച്ച് നനച്ച് ഞെക്കിപ്പിഴിഞ്ഞ് കുടഞ്ഞ്, ഒഴിഞ്ഞ ഹൃദയത്തെ ഞാന്‍ അയയില്‍ വിരിക്കുന്നു അങ്ങനെ ശുദ്ധമാക്കപ്പെടുന്നത് ഒരുവളുടെ ഹൃദയവികാരങ്ങളാവാം, ജീവിതം തന്നെയാവാം. കുളികഴിഞ്ഞീറനോടെ വരുന്ന ഒരു സ്വപ്നം രാത്രിയിലതെടുത്തുടുത്ത് കഠിനഹൃദയരുടെ നിദ്രകള്‍ക്കുള്ളിലൂടെ പതിയെ ഉലാത്തും അടുത്ത പുലര്‍ച്ചെ വീണ്ടും അടിച്ച് നനച്ച് പിഴിയപ്പെടാന്‍ വേണ്ടിയുള്ള അതിന്‍റെ സ്വപ്ന സഞ്ചാരം

“കണ്ടെന്നുമവള്‍ കണ്ടതേയില്ലെന്നും”. തൃശൂര്‍: കറന്‍റ് ബുക്സ്, 2008.

Extracts

Women Writers of Kerala

View all Authors