Sajini S.

സജിനി എസ്.

1962 മെയ് 20 ന് എറണാകുളം ജില്ലയിലെ പിറവത്ത് ജനിച്ചു. ആര്‍. ശ്രീധരന്‍റെയും കെ. കെ. രാജമ്മയുടെയും മകള്‍. പിറവം സെന്‍റ് ജോസഫ്സ് എല്‍. പി. സ്കൂള്‍, എം. കെ. എം. ബൈസ്കൂള്‍ എന്നിവിടങ്ങളില്‍ സ്കൂള്‍ വിദ്യാഭ്യാസം. കോലഞ്ചേരി സെന്‍റ് പീറ്റേഴ്സ് കോളേജില്‍ നിന്ന് കെമിസ്ട്രിയില്‍ ബിരുദം. തുടര്‍ന്ന് മലയാളസാഹിത്യത്തില്‍ എം. എ. ബിരുദം നേടി. ശാസ്ത്രീയ സംഗീതത്തിലും പ്രാവീണ്യം നേടിയിട്ടുണ്ട്. ഗവ. സെക്രട്ടറിയേറ്റില്‍ അണ്ടൂര്‍ സെക്രട്ടറിയായി സേവനം അനുഷ്ഠിക്കുന്നു. “മാന്‍ ഓഫ് ദി മാച്ച്” (2005) എന്ന ചെറുകഥാസമാഹാരമാണ് പ്രസിദ്ധീകൃതമായ കൃതി. 2007 ലെ കേസരി പുരസ്കാരം ഈ ചെറുകഥാ സമാഹരത്തിന് ലഭിച്ചു. സൂക്ഷ്മമായ ജീവിത നിരീക്ഷണമാണ് സജിനിയുടെ കഥകളുടെ പൊതുഗുണം. അനുഭവങ്ങള്‍ക്കു മുന്നില്‍ നില്‍ക്കുന്ന നിസ്സഹായനായ മനുഷ്യ ജീവിയുടെ ആത്മവിലാപമാണ് സജിനിയുടെ ചെറുകഥകള്‍. ‘ചാവുനിലങ്ങള്‍ക്കായി ഒരു പുഴ’ എന്ന കഥയില്‍, കുഞ്ഞിക്കണ്ണന്‍റെയും ആറ്റയുടെയും ജീവിതത്തിലൂടെ നമുക്ക് ചുറ്റും സംഭവിക്കുന്ന പൊള്ളുന്ന ജീവിത യാഥാര്‍ത്ഥ്യങ്ങളാണ് എഴുത്തുകാരി ആവിഷ്ക്കരിച്ചിരിക്കുന്നത്.