Sahala P.V.

പി. വി. സഹല

കോഴിക്കോട് ജില്ലയില്‍ ജനിച്ചു. കോഴിക്കോട് മലബാര്‍ ക്രിസ്ത്യന്‍ കോളേജ്, സാമൂതിരി ഗുരുവായൂരപ്പന്‍ കോളേജ് എന്നിവിടങ്ങളില്‍ വിദ്യാഭ്യാസം. സസ്യശാസ്ത്രത്തില്‍ ബിരുദം. സ്കൂള്‍, കോളേജ് തലങ്ങളില്‍ കഥാരചന മത്സരങ്ങളില്‍ സമ്മാനങ്ങള്‍ ലഭിച്ചിട്ടുണ്ട്. പി. വി. സഹലയുടേതായി പ്രസിദ്ധീകൃതമായ ആദ്യ പുസ്തകമാണ് “സാമാന്തരികം” (2007). മാതൃഭൂമി ബുക്സ് നവാഗത നോവലിസ്റ്റുകള്‍ക്കായി നടത്തിയ മത്സരത്തില്‍ ലഭിച്ച കൃതികളില്‍ നിന്ന് പ്രസിദ്ധീകരണത്തിനു തെരഞ്ഞെടുക്കപ്പെട്ട പതിനാറു നോവലുകളിലൊന്നാണിത്. ആമിനയുടെ ജീവിത വഴിത്താരകളിലൂടെയുള്ള ഒരു തീര്‍ത്ഥാടനമാണ് ഈ നോവല്‍. ഏഴാകാശവും കടന്ന്, സൂര്യനെയും ചന്ദ്രനെയും നക്ഷത്രങ്ങളെയും കടന്ന് പറന്നുകൊണ്ടിരിക്കുന്ന ഒരു പൂമ്പാറ്റയെ ആമിന സ്വപ്നം കണ്ടിരുന്നു. മഴവില്‍ വര്‍ണങ്ങള്‍ വാര്‍ന്നുവീണ തന്‍റെ കിനാക്കളുടെ മണിച്ചെപ്പില്‍ മാനം കാണിക്കാതെ ഒരു മയില്‍പ്പീലിത്തുണ്ടും കുറേ വളപ്പൊട്ടുകളും അവള്‍ കാത്തുവെച്ചിരുന്നു...... വെറുതെ....ഓത്തുപള്ളിക്കൂടത്തില്‍ മൊല്ലാക്കയില്‍ നിന്നേല്ക്കേണ്ടി വരുന്ന പീഡനങ്ങള്‍ തുടര്‍ന്നുള്ള ജീവിതത്തില്‍ അവളെ കാത്തിരുന്ന കരാളതകളുടെ തുടക്കം മാത്രമായിരുന്നു. ബാല്യത്തിന്‍റെ പ്രസരിപ്പുകളൊടുങ്ങും മുമ്പേ മുസ്തഫയുടെ രണ്ടാം ഭാര്യയായി മാറുന്ന ആമിനയില്‍ വിധി അതിന്‍റെ വിളയാട്ടം തുടര്‍ന്നുകൊണ്ടിരുന്നു. ആമിനയ്ക്ക് തന്‍റെ ശലഭച്ചിറകുകള്‍ ഒന്നൊന്നായി നഷ്ടമാവുകയായിരുന്നു. നോവലിന്‍റെ രചനാതന്ത്രങ്ങളില്‍ മൗലികത പുലര്‍ത്താന്‍ കഴിഞ്ഞിട്ടില്ലെങ്കിലും പാരായണ ക്ഷമമായ ആഖ്യാനശൈലിയാണ് ഈ നോവലിനുള്ളത്.
"സാമാന്തരികം" (നോവല്‍). കോഴിക്കോട്: മാതൃഭൂമി ബുക്സ്, 2007.

Extracts

Women Writers of Kerala

View all Authors