Dr. M. Leelakumari

ഡോ. എം. ലീലാകുമാരി

തിരുവനന്തപുരം ജില്ലയിലെ നന്നംകുഴിയില്‍ ജോണ്‍ സമര്‍ദ്ധകത്തിന്‍റെയും മേരിയുടെയും പുത്രിയായി 1948 ഒക്ടോബര്‍ 18 ന് ജനിച്ചു. ബാലരാമപുരം ഹൈസ്ക്കൂളിലും തിരുവനന്തപുരം യൂണിവേഴ്സിറ്റി കോളേജിലും കാര്യവട്ടം യൂണിവേഴ്സിറ്റി ഡിപ്പാര്‍ട്ടുമെന്‍റിലുമായിരുന്നു വിദ്യാഭ്യാസം. 1971 ല്‍ കോളേജ് അദ്ധ്യാപികയായി. 1990 ല്‍ കേരള സര്‍വ്വകലാശാലയില്‍ നിന്ന് ഡോക്ടറേറ്റു നേടി. കൊല്ലം ഫാത്തിമ മാതാ കോളേജില്‍ മലയാളം മേധാവിയായിരിക്കെ 2004 മാര്‍ച്ചില്‍ സര്‍വീസില്‍ നിന്നു വിരമിച്ചു. “സ്ത്രീ സങ്കല്പം മലയാള നോവലില്‍” (2000), “കാലത്തിനു മുമ്പേ നടന്ന കര്‍മ്മയോഗം” (ജീവചരിത്രം) (2005) തുടങ്ങിയ ഗ്രന്ഥങ്ങള്‍ പ്രസിദ്ധീകൃതമായിട്ടുണ്ട്. കൂടാതെ കേരള യൂണിവേഴ്സിറ്റി മലയാളം ഡിപ്പാര്‍ട്ട്മെന്‍റിന്‍റെ ഗവേഷണ പ്രസിദ്ധീകരണമായ ഭാഷാസാഹിതിയില്‍ നിരവധി ഗവേഷണ പ്രബന്ധങ്ങളും പ്രസിദ്ധീകരിച്ചിട്ടുണ്ട്. ഡോ. എം. ലീലാകുമാരി രചിച്ച ജീവചരിത്ര ഗ്രന്ഥമാണ് “കാലത്തിനു മുമ്പേ നടന്ന കര്‍മ്മയോഗി”. തന്‍റെ മാതാമഹനായ പി. തപസി മുത്തു നാടാരുടെ ത്യാഗോജ്ജ്വല ജീവിതത്തിന്‍റെ അകംപൊരുള്‍ ലോകത്തെ അറിയിക്കുകയാണ് ഗ്രന്ഥകാരി. തിരുവനന്തപുരം ജില്ലയില്‍ നെയ്യാറ്റിന്‍കര താലൂക്കില്‍ കുളത്തൂര്‍ വില്ലേജില്‍ ഉള്‍പ്പെട്ട നിരാലി എന്ന ഗ്രാമമാണ് ഇതിന്‍റെ പശ്ചാത്തലം. വിദ്യാഭ്യാസം അന്നാട്ടുകാര്‍ക്ക് ഒരവശ്യവസ്തുവായിരുന്നില്ല. അത്യാവശ്യം കൂട്ടലും കിഴിക്കലും അറിയാന്‍ എഴുത്തും വായനയും കൂടിയേ തീരൂ എന്നില്ല. എങ്കിലും കുറച്ചൊക്കെ അറിഞ്ഞിരുന്നാല്‍ കൊള്ളാം. അതിന് ഏതെങ്കിലും ഒരാശാന്‍റെ കുടിപ്പള്ളിക്കുടത്തില്‍ ഒന്നോ രണ്ടോ കൊല്ലം എഴുത്തിനിരുന്നാല്‍ മതി. അത്രയും കൊണ്ട് മക്കളുടെ കണ്ണും തലയും തിരിഞ്ഞോളുമെന്ന് അച്ഛനമ്മമാര്‍ കരുതിപ്പോന്നു. എന്നാല്‍ കുടിപ്പള്ളിക്കുടത്തിലെ പഠിത്തത്തിനപ്പുറവും പഠിത്തമുണ്ടെന്നും. പഠിത്തമുണ്ടായാലേ വരും കാലങ്ങളില്‍ തന്‍റെ നാടിന് ഉയര്‍ച്ചയുണ്ടാവുകയുള്ളുവെന്നും തിരിച്ചറിഞ്ഞ് വിദ്യയുടെ മാഹാത്മ്യം ഒരു വെളിപാടായി ഉള്‍ക്കൊണ്ട് എന്ത് വിലകൊടുത്തും അതിനെ സ്വന്തമാക്കാനും വരും തലമുറകള്‍ക്കായി പകര്‍ന്നു നല്‍കാനും തയ്യാറായ ഒരു വലിയ ജീവിതത്തെ അടുത്തറിയാന്‍ ഈ ജീവചരിത്ര ഗ്രന്ഥത്തിന്‍റെ വായനയിലൂടെ കഴിയുന്നു.

“കാലത്തിനു മുമ്പേ നടന്ന കര്‍മ്മയോഗി” (ജീവചരിത്രം). തിരുവനന്തപുരം: ബെന്‍ ബുക്സ്, നവം. 2005. “സ്ത്രീ സങ്കല്പം മലയാള നോവലില്‍”. കോട്ടയം: ഡി. സി. ബുക്സ്, ഒക്ടോബര്‍ 2000.

Extracts

Women Writers of Kerala

View all Authors